مجاراة أدبية جديدة:

يقول الأديب محمد ولد أحمد ولد الميداح:

قال لي الأستاذ بدنَّ هذه الطلعة الليلة:

يَا منصاب أهل الشاريق == أهُومَ مِنْ مِدَّ عَــــــرِيقَ

 فَامنَيْنْ أمْـــــشَ مِنَّ ثيق == نائبْ عنَّ جَـــاهمْ زائرْ

قــــــادمْ من دَوْلَ صَدِيقَ == دَرْجِتْـــــــهَ فَوْكُ تِشَّايِرْ

مَاهِ كِيفِتْ دَرْجِتْ لَوْطَانْ == عَــــــادُ لَزُّ خَيْلْ احْرَايِرْ

أُعرظول بالكرم ألحسان ==  أُعَرْظُ بِحْلاَيِبْ وٱنْحَايِرْ

فأجبته بالطلعة التالية:

نعرف عنى ما ريت إلاه == ماهو لحسان الِّ ترضاهْ

لخلاكات ألِّ هـــون أراهْ == كاع ألي جَ كامـــل زايرْ

الخـــــاطر هوناتِ ممناه == بيه، احسانُ كامـل سايرْ

ءُ ذ بعد اسوَ كد ألِّ كاسْ == حد اليـــوم أمن العشايرْ

تتفاضل فيه الناس، الناس == أفطنْ مـــا تكدرْ تِسَّايِرْ

علق الأستاذ عبد الله ولد عبد الفتاح على ما تداولته أنا والأستاذ بدن:

المهرجان اتباشرنَ == عنْ دولتن طاتُ معنَ

واختارت لُ معدن لغنَ == وانكيرَ كيفت لنكاير

محمد قطعا رايتن == معمول أنُّ بيهَ ساير

وامجِ دمبه للإمارات == إمثّلنَ فيهَ زاير

جابر عرظَ فم انهارات == إعيدُ داير عن داير.

فأجبته:

عبد اللهْ ءُو بـــــدّنَّ بعد == أعليهم ما فات المقصد

مخلاهم باطل مـــن كد == الفضل أعمايم وانكاير

يسعد ألِّ مـــا جَ لبلــــد == ما راهم كدامُ لا يِرْ--

بيهمْ، ذاكو كيفت لجوادْ == أهل التخمام ألِّ ناير

راهم نصرونِ وانَ زادْ == ألهم شاكر والهمزاير

ـــــــــــــــــــــــــــــــــــــــــــــــــ

أكطــاع أجديــد:

يقول المهندس أحمدو ولد أجريفين:

أرسل لي الصديق الأديب أجيه ولد عُبَيد على الخاص في الفيسبوك طلعة وكاف كانا فاتحة اكطاع بالطلع والكفان بيننا، وأنشره لأرى رأي الأصدقاء فيه، خاصة أن الصديق أجيه "سبّكْ فيّ ؤعكّب".
قال لي:
فلمــــذرذره نــت أعييت == انرَ مشــــاركات ابتيت
واعييت انرَ لبير اشويت == وانرَ قصص ول اجريفين
ذيك ألّ حـــامــد للمقيت == تلهى واتـــزيدك فاتبيظين

واليوم الفيس امنين انزاد == ابول اجريفين، ألً زين
انجيب انحيــــرَ والاّ زاد == نذبــــح بكرة والاّ ثنتين
فقلت له:
للمــــــــذرذره نــت ؤللــــــــــفيس آن من ش ما يختل
ما تيت انكافِ وكتن ول == عُبيد اجـــبرني فيهم بين
لبتيت ؤلبيــــــر امشكل == والقصص وافرح بي لين

اختــر ينحـر والا يذبح == والاّ لثنـــين ؤذ مـن زين
لخلاق امعاي فيه اشبح == كاع أشبه عندي من لثنين
فقال لي:
من لزمى يحمدو فخبار == الناس البــــــداع َلكبار
لَ يسًــــــر ملانَ لجبار == امعاهَ نفـــــرح بيهَ لين
ءُلا نكبلهَا محـال انهار == توخظلى يحمدو ليدين
نجلى بيها ذا مـن لمرار== الْيُــورَ فالنًت امسيكين
من كلت ش مبدوع ءُسار== والاّ ش باط إنَحْكَ زين

ويلَ مَزاد ءُذ معروف == أذبحنَ وانحرنَ فالحين
أراهيً محسوبَ توف == ألْوَل اجريفين انْهَ دين
فقلت له:
أسكي بيك أرانك مشكور == اعل هاذ كامل واندور
لراد العفــــور الشكــور == انكافيلك كـــد أبكدين
ؤعن لغن لكلام المنثور == افهاذ كاع اغن وحدين

وانحيرَ واذبيحَ تعـــلام == حالا ماهم دين ؤبعدين
لعادُ دين أصلا لكــلام == ألزين إخلصْ كاع الدين
فقال لي:
نعرف ياحمدو بعد أنِّ == سامع عنك حد أمغنِّ
وامنين اجـبرتـك يونِّ == ذهوَّ عين أتدك أفعين
أمغــــنِّ حــكْ أومُطنِّ == يعمِ عنك باس العينين

وَانَ ياحمدو ماهِ سَــرْ == ذ البدع ألزين ألِّ حسين
ما عندِ مـــنُّ مـاه زر == وانت عندك مـنُّ زرين.
فسكتُ

.....

گِفان گط اشتركهم التاه ولد أبته أمع محمد فال ولد سيدنا:
يقول التاه:
ثَقَّل يمَّـــــكْ فالبدعْ اشْتَـــاتْ      مُولانَ بَيْـــــــــــــــنْ الْوَزَّانَ
أوعتْ الَّا وَحْدَ منْ طَرْحَاتْ      بَيْـــــــــــــــنْ الْوَزَّانَ مُولَانَ
يقول محمدفال:
أبيَمَّكْ زَادْ انـْــــتَ بالــــذَّاتْ      فالــــــوَزَّانَ يَــــغَــــــنَّــــانَ
أصرْتَكْ زَادْ ألَّ منْ طَرْحَاتْ     مُولانَ، عَــــــــــــالم مُولانَ
التاه:
بَدْعَكْ زَيْنْ أولَاهُ مُـــــعْـــتَادْ     كَـــــــــــانْ أومَدْيُورْ افْمَكَانَ
غيرْ أشَّيْبَنْ مُولَاهْ أوعَــــــادْ     شَيْــــبَـــــــــانِي رَاصُ كتَّانَ
محمدفال:
كنْتْ أنْتَ بَدَّاعْ أومَلِيــــــــكْ     فــــالْوَزَّانَ، مَــــا تُـــــــدَانَ
أولاتَ ذَاكْ اعْلَ ذَاكْ، أوذِيكْ    مَــــــــــانِ فَاهـــمْهَ بَــعْدَانَ

ـــــــــــــــــــــــــــــــــــــــــــــــــ

مساجلة حول الإتصالات الهاتفية وانشغال بعض الناس بها:

بين محمدن ولد أبي و عبد الله ولد احميّد:

يققول محمدن ولد إبيْ:

صاحبل نبغيه أسميــــــه     ما يحتاج ابحدُّ يبغيـــــــه

إتلفن كل انهار اعليـــــه     مستكف باجبار الهـــاتف

وان كاع اجبارْ اماسيـــه     فالهاتف ذالحــــد ألا تفْـــ

ــراغ الوقت اشبهلُ لجاه     يسع والجهود إكــــــاتف

لجبار الحد الكــــان إراه     فالهاتف مــــــاه فالهاتف

فأجاب عبد الله ولد احميد:

لُ شفت أص يلّ يرعــــــاك     حدِّ ذاك المنُّ فاهـــــــلاك

تنصفـــــن فالتلفيـــــــنِ ذاك     فالهاتف نسمع ش ماتفْـــــ

ــتر فيه اخلاك دون اعراك     فالهاتف ويج متكـــــــاتف

وقت فيه اعل لفظ عـــــاس     فالهاتف محــــــال انهاتف

ماه هـــو وأياك النــــــــاس     مــن عاكب هاذ تتنـــاتف

أدب تعليمي في التوحيد مقتطف من صفحة الأستاذ: محمد ولد احمد ولد الميداح، من إبداعات الأستاذ: محمد فال عبد اللطيف

ـ نظم في التوحيد
الحلقة 8 : السمعيات التي يجب الايمان بها:

أشْهَدْ بِلِّ فِالرِّسَــــــــالَ ـ ـ ـ  عَنُّ حكْ ابْذِيكْ الْحَالَ

مِنْ عَندْ الْموْلَ تَعَــــالَ---    كِيفِتْ ذَاكْ الْ كَالْ الْمرْحُومْ

ابِّيهْ افْذِيكْ الْمَقَـــــــــالَ ـ ـ ـ  فالتَّوْحِيدْ الزَّيْنْ الْمَنْظُومْ

مَعْنَاهَ عنْ وَاجِبْ لِيمَانْ ـ ـ ـ   بِلِّ جَ كَامِلْ فِالْقُرْآنْ

و الِّ خَبَّرْ سَيِّدْ عَدْنَـــانْ----  عَنُّ يَسْوَ مَاهُ مَفْهُومْ 
وَاجِبْ بِيهْ الايِمانْ ايقَانْ ـ ـ ـ  كِيفْ الْبَعْثْ و عَنْ زَادْ اتْقُومْ

السَّاعَه يُجاز لِنْسَــــــانْ ---- بِلِّ قَدَّمْ يَجْبَرْ قُدًومْ

يَومْ التَّغَابُنْ و الخِسْرَانْ---    يومْ الْحَسْرَه والتَّنَدُّومْ

والظلْمْ اخْبَارُ والسّلْطَانْ ـ ـ ـ  الله وهُوَ الِّ يَحْكُومْ
والمَلاَئِكه و النِّيــــــرَانْ ---  الِّ فِيهَ حَرْ السَّمُومْ

و الْبحْموم وكيف الجان ـ ـ ـ  دَارْ النِّعْمَ و التَّنَعُّومْ
و القُدْرَ والْقَصَا لاَ حَانْ ـ ـ ـ    مَا يِخْلِكْ فِيهْ التَّلَوومْ

يَسْوَ لَ عَادْ الْ خَيْرًا كَانْ---   ويلَ عَادْ الشَّرْ الْمَبْرُومْ
وكِيفْ الصحْفْ وكِيفْ المِيزَانْ ـ ـ ـ الِّ مَا عَنُّ شِى مَلْمُومْ 
و الحَفَظَه بالْعَبْدْ اكْـــرَانْ ـ ـ ـ  الِّ مَا عَنْهم شِى مَكْتُومْ
وكِيفِتْ حَوظْ النَّبِى لِمْلاَنْ ـ ـ ـ  امْغَارِيفُ كِدْ النُّجُومْ

والصراطْ ابْشَوْكْ السِّعْدَانْ---  يُشَبَّهْ و اكْلاَلِيبْ الرُّومْ
والخَلْقْ ارْجِمْ فَوْكُ يَكَــــانْ ـ ـ ـيِتْخَطَّ و اللَّ يَكْلَع لَوْمْ

فِيهْ الْ يَوْخَظْ كِيفْ العُكْبَانْ---  والِّ يَوْخظْ يِحْبِى و اعُومْ

و الِّ سَاقِطْ و الِّ فَتْــــــرَانْ ـ ـ ـ والِّ بِيهْ اعْمَالُ مَحْكُومْ

و الشَّفَاعَه تَوْ الرَّحْمَــــــانْ ـ ـ ـ عَاطِ فيهَ لَذْنْ الْ لَعْيَانْ

تخْرجْ بِيهَ كَوْمْ العِصْيَـــانْ---   اوجوهِتْهُمْ كِيفِتْ لِحْمُومْ

و يِسْلِكْ مِنْهُمْ بِيهْ الغُفْــرَانْ ـ  ـ  آكُومْ و يِهْلِكْ زَأدْ آكُومْ
و المُوَحِّدْ يَسْوَ مِنْ كَـــــانْ ـ ـ ـ اسْمُ فِالنِّهَايَ مَرْحُومْ

و المَوْقِفْ سَابِكْ ذَ يِمْتَـــانْ --  اعْلَ الْخَلْقْ و يَعْرَكْ مَلْجُومْ

و اشْفَعْ فِيهُمْ سَيِّدْ لَكْــــوَانْ ـ ـ ـ فِيهَ طَاهْ الإذْنْ القَيُّومْ

واشَّفَّعْ فِالْخَلاَئقْ كِـــــــــلْ ـ ـ ـ  و انْقَذْهُمْ مِنْ كَرْبْ امْثَقَّلْ

وولو الَزْمِ مِينَ الرُّسُــــــلْ ---- فَمَّاتِ تَعْرَفْ ذَاكْ الْيَوْمْ

ذَاكْ امَّالُ بَاطِلْ يَــــوْمْ الْــ  ـ ــ  مَقَامْ الْمَحْمُودْ الْمَعْلُومْ

حَدْ انْكَرْ مِنْ ذَ شِ مَعْرُوفْ ـ    بالضَّرُوره كُفْرُ مَعْلُومْ

ويلَ مَذَاكْ اعُودْ اتَـــــوْفْ ---- زَايِغْ وابْضَلاَلُ مَحْكُومْ